Sarkozi-myslimanëve: Vendi juaj është në Francë

“Vendi juaj është në Francë dhe ju keni të drejtë të shprehni besimin tuaj”, kështu ka deklaruar presidenti Francës Nikolas Sarkozi, gjatë një fjalimi të mbajtur në Xhaminë e Madhe të Parisit, ku inauguroi një memorial për ushtarët myslimanë që vdiqën për Francën gjatë Luftës së Dytë Botërore.

Presidenti francez ka përkrahur myslimanët duke u shprehur se gjithkush ka të drejtën të shprehë besimin e tij dhe një gjë të tillë nuk ka kush t’ia mohojë.

Në përgjigje të kandidates ultra djathtiste e Frontit Kombëtar Marine Le Pen, e cila ka kritikuar, siç tha ajo, vërshimin e ushqimit hallall në rajonin e Parisit, Sarkozi ka thënë se synon futjen e etiketave të qarta në ushqim, në mënyrë që konsumatorët të dinë se çfarë janë duke ngrënë, bënë të ditur AP.

Produktet hallall janë shndërruar në një debat kryesor gjatë fushatës për zgjedhjet presidenciale në Francë. Sarkozi e ka përdorur këtë çështje për të fituar votat e të djathtës ekstreme, e cila ka manifestuar qartë alergji ndaj komunitetit mysliman. Më parë, Sarkozi pati refuzuar një kërkesë nga komuniteti mysliman që produkteve të mishit hallall, tu vihej një shenjë e cila tregonte se është therrur sipas dispozitave islame. Por, më pas ai pati deklaruar se:”Mishi hallall renditet tek produktet për të cilat populli frances tregon interes.”

Ndërkohë në prill të 2011 me iniciator pikërisht presidentin Sarkozi, Franca miratoi ligjin për ndalimin e veshjes se femrës sipas besimit islam duke u bërë kështu vendi i parë në botë që ndalon mbajtjen e perçeve apo shamive që mbulojnë fytyrën sipas traditës së besimit mysliman.

Shumë myslimanë shprehen se po vihen pa të drejtë në shënjestër. Ata thonë se zoti Sarkozi dhe partia e tij po diskriminojnë myslimanët. Ndërsa qasje e fundit e Sarkozi në favor të myslimanëve shihet si mënyrë për të siguruar sa më shumë mbështetje në zgjedhjen e ardhshme presidenciale.

Me gjithë mbështetjen e fundit ndaj myslimanëve, sondazhet tregojnë se Sarkozi ende mbetet prapa kandidatit socialist Francois Holand në prag të zgjedhjeve presidenciale më 22 maj