Tumoret si epidemi, 6000 raste të reja në vit

Raporti në Komision. Shefi i onkologjikut: Duhet më shumë vëmendje. Zv. ministri Spahia: Nga 2005 kemi 5-fishuar investimet.

Shtohen të sëmurët me kancer në vend. Shifrat nga shërbimi i onkologjisë flasin për 6000 raste të reja në vit. Ato u bënë publike dje, në një seancë dëgjimore në Komisionin Kuvendor të Shëndetësisë. Shefi i shërbimit të onkologjisë, Agim Sollaku, kërkoi vëmendjen e deputetëve për trajtimin e të sëmurëve. Zv.ministri i Shëndetësisë, Bardh Spahia, njëkohësisht dhe kryetar i Komitetit të Kancerit, raportoi në lidhje me strategjinë kombëtare të kontrollit të kancerit. Ai bëri një panoramë të situatës aktuale dhe njëkohësisht parashtroi objektivat për të ulur incidencën e sëmundjes. “Nga viti 2005 e deri më sot është 5-fishuar buxheti për citostatikët, medikamentet bazë të trajtimit të pacientëve me tumor. Në vitin 2003, fondi për këto barna ishte 850 mijë euro. Sot për to nga buxheti parashikohen 5 milionë euro. Investimet kanë qenë kolosale në skanera e në mamografi diagnostikimi. Mund të themi që për pajisjen me këto lloj aparaturash Shqipëria është në të njëjtat raporte si vendet e BE. Kemi 1 mamografi për 100.000 banorë”, tha Spahia. Ai shtoi se strategjia kombëtare e kontrollit të kancerit ka vënë në zbatim objektivat afatshkurtër. “Mbetet prioritet fuqizimi i spitaleve rajonale me aparatura diagnostikuese bashkëkohore si mamografitë, skaneri dhe rezonanca. Një pjesë e tyre janë pajisur tashmë dhe procesi është drejt përfundimit”, tha Spahia. Kanceri është sot shkaku i dytë madhor i vdekjeve në Shqipëri dhe pjesa më e madhe e pacientëve zbulohen në stad të avancuar. Nga sa raportoi në Komision zv.ministri, Ministria e Shëndetësisë ka pasur mbështetje maksimale nga qeveria për të mundësuar vënien në zbatim të strategjisë parandaluese. “Rritja e numrit të të sëmurëve me tumore në vendin tonë lidhet me rritjen e jetëgjatësisë së popullatës, e cila shton incidencën. Sa i përket numrit të rasteve, jemi në të njëjtat shifra si vendet e rajonit”, tha Spahia. Deputetët e opozitës kërkuan shpjegime për mënyrën si prokurohen barnat. Drejtori ekonomik në Ministrinë e Shëndetësisë, Sajmir Kadiu, deklaroi se i është propozuar qeverisë të ndryshojë ligjin e prokurimeve, për të lehtësuar procedurat e blerjes se barnave nga ana e spitaleve. Sipas të dhënave të Ministrisë së Shëndetësisë, rritja e shpejtë e tumoreve në Shqipëri erdhi pas viteve ’90, kur ndryshoi edhe mënyra e jetesës së shqiptarëve. Ministria e Shëndetësisë ka deklaruar se një hap për parandalimin e tumoreve është futja në kalendarin e vaksinimit të vaksinës kundër Hepatitit B, vaksinë e cila parandalon kancerin e mëlçisë. Ndërkohë po punohet për futjen në kalendar dhe të vaksinës kundër kancerit të qafës së mitrës në moshat 13 vjeç.