Politikanët, një pagë për ndërtimin e Xhamisë

Shkuan për të uruar festën e Kurban Bajramit në Bashkësinë Islame të Kosovës por dolën me një premtim.
Një pagë do e japin për ndërtimin e xhamisë qendrore në Prishtinë.

Ky premtim doli pasi që myftiu Naim Tërnava i pyeti si me shaka nëse do ta bënë një gjë të tillë.

Të parit që ju tha dhe i pari që pranoi, madje me gojën plotë, ishte nënkryetari i AAK-së, Ahmet Isufi, i cili tha se do e jep një pagë të tijën, për ndërtimin e tempullit fetar.

“Kjo është edhe një solidaritet që bëhet për ndërtimin e një tempulli fetar, prandaj edhe e ndjejmë si obligim......normalisht”, ka thënë ai.

Njësojë premtoi edhe kryetari i Kuvendit, Jakup Krasniqi, i cili tha se kjo shkon në interes të kombit.

“Kjo është shumë e mirë, dhe çdo gjë që shkon në interes të kombit dhe vendit tonë, ne jemi të gatshëm ta bëjmë”, ka thënë ai.

Ndërsa, kryetari i Komunës së Prishtinës, Isa Mustafa tha se do kontribuon por nuk mund të saktësonte me një pagë, me më shumë apo me më pak.

“Tek ndërtimi i xhamisë nuk thuhet kush sa do të jep sepse janë çështje, megjithatë janë çështje të besimeve dhe çështje interne, mirëpo unë besojë se të gjithë ne do të kontribuojmë”, ka thënë ai.

Këto premtime u bënë në Bashkësinë Islame të Kosovës, të premten në ditë e Kurban Bajramit, pasi që myftiu Tërnava e filloi këtë muhabet thjeshtë për të parë disponimin e tyre për të dhuruar për ndërtimin e xhamisë qendrore në Prishtinë./ Kosovapress/