Myslimanët rol qëndror në 100 vjet Pavarësi

Në kuadër të aktiviteteve për 100 vjetorin të Pavarësisë së Shqipërisë, Komuniteti Mysliman i Shqipërisë në bashkëpunim me Qendrën Kërkimore të Shkencave Islame në Universitetin Bedër, organizuan sot (22 nëntor 2012) një simpozium mbi rolin e Islamit në realizimin e Pavarësisë dhe konsolidimin e shtetit shqiptar.

Në një panel diskutimi me të ftuar Kancelarin e KMSH-së z. Ali Zaimi, Drejtorin e Kulturës në KMSH z. Genti Kruja, si dhe dy pedagogët e Universitetit Bedër, Veton Tulla dhe Elton Karaj, u diskutuan dhe u parashtruan fakte e të dhëna me vlerë mbi rolin e madh që kanë luajtur myslimanët në Pavarësinë e Shqipërisë, mbi tolerancën fetare te shqiptarët, mbi fenë e lirinë dhe mbi dashurinë për atdheun në Islam.

Kancelari i Komunitetit Mysliman të Shqipërisë z. Ali Zaimi, theksoi se kontributi i myslimanëve në çështjen kombëtare lidhet drejtpërdrejt me të qenët besimtar dhe se ata që na dhuruan këtë vend ishin padyshim besimtarë të familjarizuar me kulturën, traditën, ritet dhe moralin islam.

“Në vitin 1900 viset shqiptare përbëheshin nga një popullsi 90% myslimane dhe kontributi i tyre në përgatitjen forcimin dhe konsolidimin e vetëdijes kombëtare është i pazëvendësueshëm dhe i pamohueshëm. Çdo sipërmarrje do të ishte e pamundur pa ndihmën e tyre. Një fakt i njohur nga historia është edhe se nga 40 firmëtarët e pavarësisë 27 ishin myslimanë dhe nga 63 delegatë mbi 2/3 ishin myslimanë. Ata kishin edukatë dhe njohje të thellë të Islamit, disa prej të cilëve ishin klerikë të mirëfilltë”, nënvizoi z. Zaimi.

Dokumentet historike tregojnë se Shqipëria kishte mbi 1600 xhami, të cilat krahas funksionit të tyre primar kanë shërbyer edhe për zhvillimin e mbledhjeve, takimeve e kuvendeve me karakter social-kombëtar, ndër të cilat është edhe Lidhja e Prizrenit, e zhvilluar në xhaminë Bajrakli.

Në vazhdim z. Zaimi përmendi edhe rolin e jashtëzakonshëm të myslimanëve në arsim e publicistikë, me shkrime në revista si “Zani i Naltë”, “Kultura Islame” e “Njeriu”, “Drita Islame” etj. Ai u ndal edhe në faktin se komunizmi, të cilin dijetarët myslimanë e dënuan që në hapat e parë, e fshehu dhe e injoroi totalisht kontributin e myslimanëve për çështjen kombëtare dhe konsolidimin e shtetit shqiptar.

Në fund z. Zaimi bëri thirrje për një rivlerësim të figurave të larta myslimane të cilët kanë një kontribut madhor në shërbim të çështjes kombëtare, që, sipas tij, nuk duhet mohuar kurrsesi.

Disa nga emrat më të shquar të kulturës islame që kontribuuan për besimin dhe kombin dhe që u përmendën në simpozium ishin: H. Vehbi Dibra (Agolli), Hafiz Ali Korça, Sheh Ibrahim Karbunara, Hoxha Kadri Prishtina, Ymer Haxhi Prizreni, Ferit Vokopola, Xhemal Naipi, Hafiz Ibrahim Dalliu, Ismail Efendi Ndroqi, Said Najdeni, Zyber Halluli, Daut Boriçi, etj.

22-11-2012

/Drita Islame/