Shtypi dhe politika greke: Me Prevezën, Berisha provokoi

Deklarata e kryeministrit shqiptar Sali Berisha, që u bë shkak për anulimin e vizitës së ministrit të Jashtëm grek Dimitris Avramopulos në Tiranë, ka zënë vend në gjithë shtypin grek, në gazetat dhe websitet informative.

Gazeta “Protothema” e quan atë që ndodhi një “incident diplomatik greko-shqiptar dhe përkeqësim të papritur të marrëdhënieve greko-shqiptare, të cilat janë si zhiva, ftohen lehtë dhe nxehen po aq lehtë". “Para se të hipte në avion për të udhëtuar në Tiranë, Ministri i Jashtëm grek u informua për deklaratat e kryeministrit të Shqipërisë, i cili pretendon se territoret shqiptare zgjaten nga Preveza në Preshevë, nga Shkupi në Podgoricë", shkruan “Protothema” dhe vijon me sqarimin e kryeministrisë duke e cilësuar atë “përpjekje për të ndrequr një gabim trashanik”.

“Berisha: Nga Preveza, në Podgoricë, Shqipëri e Madhe”, me këtë titull vjen gazeta “To Vima”, e cila shkruan se deklarata në fjalë, bëri që të anulohet vizita e ministrit Avramopulos, si shprehje e pakënaqësisë. Sipas gazetës, Berisha në Vlorë foli për Shqipërinë e madhe nga Preveza në Podgoricë e në Malin e Zi, duke sjellë kështu në vëmendje çështjen çame.

“Ta Nea” shkruan: ”Berisha provokon - Shqipëria e Madhe fillon nga Preveza”. Edhe kjo gazetë thekson se kryeministri shqiptar foli për "pavarësinë kombëtare të të gjitha trojeve shqiptare nga Preveza në Preshevë, nga Shkupi në Podgoricë". Më pas botohet edhe sqarimi i zyrës së shtypit të kryeministrisë shqiptare.

Gazeta “Efimerida” shkruan se fjalimi i Sali Berishës në përvjetorin e pavarësisë së vendit, solli një përkeqësim të mëtejshëm të marrëdhënieve greko-shqiptare”. Sipas kësaj gazete “në thelb, deklaratat e Berishës krijojnë pretendime territoriale të Shqipërisë ndaj Greqisë”.

Reagime ka patur edhe nga disa parti politike greke.

E Majta Demokratike, DIMAR, pjesë e koalicionit qeverisës shprehet se "Deklaratat zjarrvënëse të Sali Berishës janë përtej çdo koncepti të bashkëpunimit në Ballkan, minojnë bashkëjetesën paqësore të shqiptarëve me popullin grek dhe nxitin nacionalizmin ekstrem. Ato janë të rrezikshme dhe tërësisht të dënueshme".

SYRIZA, partia opozitare e Aleksis Tsipras shprehet se "Histeria nacionaliste e zërave që nuk i shërbejnë paqes dhe bashkëpunimit midis popujve dhe qeverive në rajonin tonë është e rrezikshme dhe hedh vaj në zjarrin e vendeve të djathta ekstremiste që shfrytëzojnë deklarata të tilla të papërgjegjshme. Deklarata korrigjuese nuk i zbut shprehje të tilla, të cilat ushqejnë besimet obskurantiste dhe mesjetare”.

“Agimi i Artë” deklaron: “Berisha del nga binarët, duke deklaruar se Preveza është shqiptare”.

Partia komuniste, KKE e denoncon fjalimin e Berishës si “nacionalist” dhe paralajmëron rajonin në lidhje me “rreziqet që vijnë nga planet e borgjezisë në Shqipëri me mbështetjen e SHBA-së dhe BE-së, për të ndryshuar kufijtë në Greqi dhe në Ballkan”.

Ndërkaq analistë grekë thonë se deklarata të tilla janë të pritshme në klimën e përgjithshme të nacionalizmit, në atmosferën festive dhe në prag të fushatës së zgjedhjeve parlamentare në Shqipëri.

DEKLARATA E BERISHES NE VLORE
“Mirëmbrëma Vlora! Mirëmbrëma mbarë Shqipëria e shqiptarët kudo ku jeni! Përshëndetjet më vëllazërore nga Vlora e flamurit, Vlora e Ismail Qemal Vlorës, Vlora e pavarësisë. Mirënjohjen më të thellë për këtë pritje vëllazërore. Do të lexoj këtu, para jush, këto pak fjalë që shkrova në këtë pergamenë:
Vlorës, qytetarëve të saj, Ismail Qemal Vlorës e burrave të tjerë të kombit, që shpallën në këtë qytet të përjetshëm, në 28 nëntor të vitit 1912, pavarësinë e Shqipërisë, pavarësinë e Shqipërisë etnike, Shqipërisë së të gjitha trojeve shqiptare, nga Preveza në Preshevë, nga Shkupi në Podgoricë. Nder përjetë babait të pavarësisë së Shqipërisë Ismail Qemal Vlorës, burrave që firmosën aktin e pavarësisë, qytetarëve të Vlorës e të mbarë Shqipërisë! Gëzuar 100 vjetorin!"