76 vjet nga ndarja nga jeta e Haxhi Vehbi Dibrës

IN MEMORIAM

Marsin e vitit 1937 do të ndërronte jetë figura më e shquar e islamit në Shqipëri, patrioti e atdhetari Haxhi Vehbi Dibra. 24 marsi i atij viti të ftohtë ishte një humbje e madhe jo vetëm për myslimanët por për të gjithë kombin shqiptar.

Kontributi Haxhi Vehbi Dibrës për gjuhën shqipe, për Flamurin Kombëtar kështu siç e kemi, për lirinë, kompaktësinë e pavarësinë e popullit shqiptar, për bashkëjetesën paqësore pa dallim të besimit fetar e krahinor dhe për formimin e jetën e shtetit të parë shqiptar, është i pazëvendësueshëm.

Njohja në thellësi e Kur’anit dhe e përvojës profetike të Muhamedit (a.s.), i krijuan bindjen se edhe popullin tonë Zoti e kishte krijuar shqiptar, se edhe gjuha shqipe ishte dhuratë hyjnore, prandaj edhe populli ynë shqiptar duhej të jetonte i lirë e i pavarur në Shqipëri e, duhet të gëzonte si gjithë popujt tjerë resurset e këtij vendi.

Vehbi Agolli, që në krye të herës, në detyrën e myftiut të Dibrës, u shqua si ideolog dhe veprimtar i lëvizjes për autonomi dhe pavarësi. Vehbi Agolli mori pjesë si ideator e organizator i lëvizjes patriotike të viteve 1890 e më pastaj, prandaj edhe dibranët filluan t’i japin vlerën së gjalli, duke e thirrur Vehbiu i Dibrës, Vehbi Dibra.

Me dijen e tij të zgjeruar, me drejtimin e tij në krye të myslimanëve, si dhe me përpjekjet e tij për interesat kombëtare, e kishte fituar respektin e tërë popullit. Ai dëgjohej me shumë vëmendje dhe ndiqej nga tërë populli. Ai përpiqej t’i jepte fesë drejtimin e duhur, ta bënte atë udhëheqëse në të mirë të kombit tonë.

76 vjet nga largimi i tij janë shumë, por kontributi dhe vepra e tij do të mbeten të paharruara përgjithmonë.