Muhamedi Alejhi Selam, Përshkruan Xhennetin

Lavdia I Takon Allahut.
Salavatet dhe selamet qofshin mbi Muhamedin (lavdë­ri­mi dhe paqja e Allahut qofshin mbi të).

Të nderuar agjërues!

Muhamedi (lavdë­ri­mi dhe paqja e Allahut qofshin mbi të) e ka përshkruar qartë xhenetin, të cilin Zoti ua ka premtuar njerëzve të devotshëm, që muslimani të qetësohet dhe të kënaqet në të.
Kush do të hyjë i pari në xhenet?

Muhamedi (lavdë­ri­mi dhe paqja e Allahut qofshin mbi të) ka thënë: “Do të vij ditën e Gjykimit te dera e xhenetit dhe do të kërkoj që të hapet e roja do të pyesë: “Kush është?” Do të përgjigjem: “Muhamedi.” Do të thotë: “Jam i urdhëruar që të mos ia hap askujt para teje.” (Transmeton Muslimi)

Çfarë cilësish do të kenë grupi që do të hyjë në xhenet?

Muhamedi (lavdë­ri­mi dhe paqja e Allahut qofshin mbi të) ka thënë: “Grupi i parë (i njerëzve) i cili do të hyjë në xhenet do t’i kenë fytyrat si Hëna natën e katërmbëdhjetë e ata do të jenë si ylli flakërues në qiell që ndriçon. Nuk e kryejnë nevojën as të madhe e as të vogël, nuk pështyjnë, krehrit do t’i kenë të artë e era e djersës do të jetë erë misku. Gratë e tyre do të jenë hyri. Forma e tyre do të jetë në formë të një njeriu, në formë të babait të tyre Ademit: me gjatësi 60 bërryla (30 metra).” (Transmeton Buhariu)

Cili është përshkrimi i hyrjeve të xhenetit?

Muhamedi (lavdë­ri­mi dhe paqja e Allahut qofshin mbi të) ka thënë: “Kush i shpenzon dy lloje nga pasuria e tij në rrugën e Allahut, do të thirret nga dyert e xhenetit: “O rob i Allahut, kjo është e mira; kush ka qenë prej atyre që e kanë falur namazin, do të thirret nga dera e namazit; kush ka qenë prej luftëtarëve, do të thirret nga dera e xhihadit; kush ka qenë prej agjëruesve, do të thirret nga dera e Rejjanit (kjo është derë në të cilën hyjnë vetëm ata që kanë agjëruar); kush ka qenë prej dorëdhënësve, do të thirret nga dera e sadakasë.” Ebu Bekri ishte i pranishëm dhe e pyeti Muhamedin: “O i Dërguar i Allahut, a është ndokush i cili do të thirret prej të gjitha dyerve?” I Dërguari i Allahut iu përgjigj: “Po, dhe shpresoj se ti do të jesh prej tyre.”(Transmeton Buhariu)

A ka vdekje në xhenet?

Muhamedi (lavdë­ri­mi dhe paqja e Allahut qofshin mbi të) ka thënë: “Kur të hyjnë banorët e xhenetit në xhenet, do të thërret një thirrës: “Për ju do të ketë jetë përgjithmonë dhe nuk do të vdisni kurrë. Për ju do të ketë shëndet dhe kurrë nuk do të sëmureni, do të jeni gjithnjë të rinj, kurrë nuk do të plakeni dhe për ju do jetë kënaqësia dhe kurrë nuk do të mërziteni.” (Transmeton Muslimi)

Si janë të cilësuar banorët e xhenetit?

Muhamedi (lavdë­ri­mi dhe paqja e Allahut qofshin mbi të) ka thënë: “Do të hyjnë banorët e xhenetit në xhenet me pak flokë, sikurse t’i kenë të lyera me këna, dhe do të jenë me moshë tridhjetë apo tridhjetetrevjeçare.” (Transmeton Ahmedi).

“Do të hyjnë në xhenet popuj (njerëz), e zemrat e tyre do të jenë si zemrat e shpendëve.”(Transmeton Muslimi)

“Do t’i jepet besimtarit në xhenet forcë kaq dhe kaq për marrëdhënie seksuale.” Është pyetur: “O i Dërguar i Allahut, vërtet do të jepet aq?” Tha: “Do t’i jepet forcë sa njëqind vetë.”(Transmeton Tirmidhiu)

“Kush hyn në xhenet, do të begatohet e nuk do të ketë dëshpërim, nuk i vjetrohen rrobat dhe nuk i kalon rinia.” (Transmeton Muslimi)

Të nderuar agjërues! Hyrje e ndershme, përshkrim i bukur, të rinj dhe të pavdekshëm. Shpejtoni për në xhenetin e Allahut të Lartësuar!

Allahu im! Na i mundëso e mos na privo nga këto të mira!