Nuland apel deputetëve: Shqipërisë i duhet kjo reformë, mbështesni propozimin hibrid

Ndihmës Sekretarja Amerikane e Shtetit, Viktoria Nuland edhe një herë i ka bërë thirrje deputetëve të Kuvendit të Shqipërisë që të votojnë propozimin hibrid për reformën në drejtësi. Ajo i kërkon palëve politike në Shqipëri të gjejnë sa më shpejt zgjidhjen dhe të votojnë në 21 korrik propozimin e mbështetur prej saj për reformën.

“Shtetet e Bashkuara dhe unë personalisht kemi qenë për një kohë të gjatë mbështetës të demokracisë shqiptare. Shqipërisë i duhet kjo reformë. U bëj thirrje patriotëve shqiptarë të mbështesin propozimin hibrid që unë përkraha gjatë vizitës sime. Shtetet e Bashkuara vazhdojnë të shpresojnë se udhëheqësit politikë do t’i zgjidhin dallimet që kanë dhe të bashkohen përreth propozimit hibrid. Nëse nuk munden, përgjegjësia do të jetë e deputetëve individualisht që të votojnë në favor të reformave që po kërkojnë 91% e shqiptarëve”, apeloi Nuland. Ndërkaq, po ditën e sotme priten të tjera thirrje nga diplomatë të lartë të SHBA dhe për të votuar reformën.

20 korrik 2016 (gazeta-Shqip.com)