Haxhi Vehbi Dibra (Agolli), Kyetar i Pleqësisë ( Senatit ) të parë Shqiptarë

Në 100 vjetorin e Shpalljes së Pavarësisë së Shqipërisë, nderojmë plot respekt kujtimin e atdhetarit të shquar Vehbi Dibra, i cili midis personaliteteve që vunë gur të rëndësishëm në themelet e shtetit shqiptar nga Kuvendi Kombëtar i Vlorës u zgjodh Kyetar i Pleqësisë (senatit) të parë Shqiptarë

Vehbi Dibra është personalitet i shquar i Lëvizjes Kombëtare Shqiptare, teolog dinjitoz, i cili u shfaq në momentet vendimtare të historisë sonë dhe shumë shpejt zuri vend në plejadën e patriotëve të rëndësishëm e më në zë të Rilindjes Kombëtare Shqiptare. Ai hyri në skenën politike e shoqërore nga fundi i shekullit XIX, në vitet e furishme të luftës së popullit shqiptar për çlirim kombëtar, vite kur u ngjallën shpresa të reja në përpjekjet e tij për të realizuar ëndrrën shekullore për të pasur shtetin e vet të lirë e të pavarur.

Vehbi Dibrën që të ri e gjejmë pjesëmarrës të shumë mbledhjeve e kuvendeve të rëndësishme të kohës, që lidhen me luftën e përpjekjet e popullit tonë për pavarësi, përparim, kulturë e dije. Është e njohur pjesëmarrja dhe ndihmesa i tij në “Lidhjen e Dibrës” të krijuar në dhjetor të vitit 1896. Ai mbështeti fuqimisht idetë dhe vendimet e Kongresit të Manastirit, për një alfabet të ri të gjuhës shqipe, dhe për mësimin e shqipes në shkollat e Shqipërisë. Më pas, atë do ta shohim kryetar të Kongresit të Dibrës, do ta gjejmë në krye të luftës kundër atyre që përpiqeshin të pengonin zhvillimin e kulturës kombëtare shqiptare dhe pranimin e alfabetit shqip. Por ajo që merrte vlera të veçanta për vetë situatat dhe problemet që kalonte vendi ishte këmbëngulja me të cilin Vehbi Dibra dhe patriotët e tjerë shtronin çështjen e bashkimit të kombit shqiptar, kërkesën që shqiptarët të administrojnë vetë vendin e tyre si dhe domosdoshmërinë e hapjes së shkollave shqipe.

Ngjarja më e rëndësishme në jetën dhe veprimtarinë patriotike të Vehbi Dibrës është pjesëmarrja në Kuvendin Kombëtar të Vlorës, që shpalli Pavarësinë e Shqipërisë dhe që e zgjodhi këtë burrë të Dibrës e të mbarë vendit kryetar të Pleqësisë (Senatit) të parë shqiptar – si organ kontrollues e këshillues të qeverisë

Haxhi Vehbi Dibra ishte një propagandist i shkëlqyer, që punonte gjithmonë për mbarëvajtjen e kombit e të atdheut. Në unitetin dhe bashkimin e gjithë shqiptarëve shihte të vetmen rrugë për të siguruar të ardhmen. Ai do të thoshte në Kuvendin Kombëtar të Vlorës më 28 nëntor 1912 se “Kristiani e myslimani janë vëllezër shqiptarë të pandarë”.

“Armikut të atdheut i pritet hovi e guximi në qoftë se na shef të bashkuar e të lidhur për një qëllim të naltë”. “Naltësimi e përparimi i një vendi varet në sigurimin e qetësisë së brendshme. Atje ku mungon qetësia, nuk mund të përparojë industria, tregtia e burimet e tjera ekonomike që e lumturojnë një popull”.

Dokumentacioni i kohës dëshmon: “ se Vehbi Dibra me cilësinë e Kryetarit të Pleqësisë, iu bë krah Ismail Qemalit. Në çdo hap, në çdo problem që kishte shteti i ri, ai ndihmonte me idetë, gadishmërinë dhe veprimin e tij. Kështu, krahas ngritjes së flamurit, i kushtoi një vëmendje të madhe edhe punës së ngritjes dhe të organizimit të organeve lokale të Qeverisë së Përkohshme në Dibër e gjetkë. Në 30 mars, kur Ismail Qemali, në krye të një delegacioni shkoi në disa kryeqytete të Evropës për të sensibilizuar opinionin evropian në favor të çështjes shqiptare, atij i u besua detyra e kryesimit të Qeverisë së Përkohshme. Ai ishte i njohur si luftëtar i denjë për liri të popullit… Ishte njeri iimponueshëm dhe i pakorruptueshëm. Tek Haxhi Vehbi Dibra ( Agolli) gjejmë një propagandist të shkëlqyer, që punonte gjithmonë për mbarëvajtjen e kombit e të atdheut. Në unitetin dhe bashkimin e gjithë shqiptarëve shihte të vetmen rrugë për të siguruar të ardhmen e atdheut..

Vehbi Dibra bënë pjesë në atë grup patriotësh të veshur me petkun fetar që nuk i pushuan kurrë përpjekjet që ndjenjat kombëtare, atdhetare, kulturore e qytetare, të dashurisë, mirëkuptimit e harmonisë të mbjellura nga rilindasit, të lëshonin rrënjë të thella në të gjitha shtresat e popullit Ai ishte jo vetëm predikues, por edhe veprimtarë i shquar, që këto vlera shoqërore e shpirtërore të viheshin në shërbim të çështjes së Atdheut dhe popullit.. Vehbi Dibra ishte njeri me autoritet, jo rrallëherë kërkohej për të dhënë ndihmesën e tij në zgjidhjen e problemeve dhe të situatave të vështira.

Duke shkruar këto radhë mendoj se nuk duhen lënë në hije Kyetari i Senatit të Parë Shqiptarë por duhet lartësuar për t’i dhënë vendin që i takon.

Qatip Mara

23 Nentor 2012